جريدة العاصمة 24
ثارَ القطيعُ سوى الأَغنامِ ماسارُوا
والصوتُ يعلو وريحُ القولِ أَقذارُ
الكلُّ يهتفُ مِنْ أَرحامِ طائفةٍ
للدّينِ يفزَعُ لولا الدين ما ثارُوا
رجعنا نسمع بشوارع اللاذقية هتافات طائفية قذرة ,
سمعناها من زمان , و دايماً بنسأل لوين رح تودي هيك استفزازات
والنتيجة كانت !! ” خراب البلد ”
وياريت يسمعني الطرفين منيح و بكل صراحة !!
أنت قتلت , وهو قتل , عندك مفقودين , و عنده مفقودين ,
أنت خطفت وهو خطف , أنت عذبت وهو عذب ,
و فيه فيديوهات بتفضحك , وفي كمان متلها بتفضحو
بكفي , حاج حزن , خلو الفهمانين يديرو البلد و انضبو ببيوتكن ,
خلي الصحابة و دينك ومعتقداتك جوا بيتك ,
و سكر عليهن الباب منيح , وطلاع اهتف هتاف تاني بفيد البلد ,
تروك 1400 سنة وراك , و طلاع طالب بحقك بالكرامة و الحياة الحرة ليوقف الكل معك ,
وما تخلي العرق الطائفي يتحرك فيك , لأي خبر بتسمعو أو حدث بيصير , وما مين ما قال يا قوم : ” الفزعة ” , تحمل سيفك و تطلع ,
هي دولة ما قبيلة , والكلام للأطراف كلها , فيه دولة وفيه أمن و فيه وزراء و فيه قائد حالي ,
ما كل خبر بتسمعو من جوا أو برا البلد تتحرك فيك كل غرائزك البشعة , ضبوط حالك , و فكر كمواطن , مش كقطيع
الهتافات الحاقدة بتحرق الكل , لا تفكر حالك هلأ قوي , النظام زمان هيك كان مفكر لحتى انهار , وترك أبرياء يدفعوا التمن ,
النظام و بشار خوفوا الشعب من حرب طائفية , وأنتو اليوم عم تعملو الي بيرضي بشار , و بيأكد صحة كلامو , اصحو , حربكن مع النظام وضد النظام خلصت , هلأ أنتو شعب لوطن واحد و بلد واحد .
إذا دوامة الحقد و القتل رح تستمر , الكل رح يخسر , و الضعيف اليوم بكرا بيقوى أو بيستقوى , وفيه كتير دول ناطرة تتدخل , ضليتو مختلفين بين علم عيونو خضر , و علم عيونو حمر , لحتى قلعتو عيون البلد و صارت عميا , و صرتو تتخبطو بأقذر الهتافات ,
و ين الفنانين المعارضين الي بيخافو عالبلد و بينادوا بالحرية , وين المثقفين الكبار , و الإعلاميين الفهمانين , وين الشرع و وعودو للناس ؟؟
وين التوعية , والدفاع عن حرية السوريين و كراماتن و أعراضن , الدفاع عن المظلومين بحياتو ما كان انتقائي .
حمام الدم الكل رح يسبح فيه , بيكفينا دم و قتل و اجرام
كأنكن عم تكفوا مخطط نظام بشار , يا حيف بس
حرام عليكن البلد , خلوا فيها شي حلو .
